Laot mich noe altied gedach höbbe det v'r 'ne eige Limburgse voetbalbóndj hejje wo 't ieëste van Lin in sjpeeltj. Ós get leger teams deje det inne óngeraafdeiling. Toet 1996 woor det ouch 't geval. Op de ein of anger meneer aevel is 't mich toen óntgange det de KNVB 't eint en angert 'n nuuj aanzeen haet gegaeve. De aafdeiling Limburg heel op te besjtaon en Nederlandj wórt ingedeildj in districte.
Lin sjpeeltj noe in Zuid II en ómdet ós zebra's zich aafgeloupe seizoen nao 'n sjoeën twieëdje plaetske wiste te sjpele, make v'r nag kans óm in 'n naocompetitie nae de veerdje klas te promovere.
Ich vinj naocompetities waal get höbbe en wiewaal ós Roda 't dao-in behuuërlik leet ligke, is d'r mörgemiddig veur Lin weer 'ne wedstried óm haer oet te kieke; óm half drie sjpeeltj VITA taege B.V.V.’27. Wie ich d'rvan huuërdje woor mien ieëste reactie: huh, waem? In 't net 1700 miense tèllendje dörpke Megen, det zich officieel sjtad moog numme mer geweun 'gemeente Oss' op 't plaatsnaambord haet sjtaon, wurtj aafgetraptj taege 't ieëste van Blitterswik, zoeë wie ze 't dao zègke. Mit 1200 inwoners is 't Venrojse kèrkdörp dudelik in de minderheid mer det zaet nieks euver häör kanse. Door häör resultate inne competities van Zuid II wórte VITA en B.V.V. in 'n al maondje geleje gemaaktj sjema geplaatsj wodoor ze zich mörge treffe.
Waat 't allemaol mit Lin van doon haet, is det de winnaar van det pötje in det eigeste sjema taege Lin moog sjpele. En dus moge ós zebra's volgendje waek zunjig of nao 't Braobantse Megen of nao 't nag net Limburgse Blitterswik óm dao de ieëste van twieë partieje te sjpele veur 'n plaetske inne veerdje klas. Dae zunjig achdaag wurtj in Lin den ech óm de kölse gesjpeeldj. Volgendje waek sjtaon de bösse veur de supporters klaor en ómdet de reis get doertj, is d'r tied zat óm 'n clubleed oet 1948* in te sjtudere.
Laot ós nag mer 'ns zinge van de voetbalclub van Lin:
Waat d'r ouch kan gebeure, v'r gaon noeëts de kaetel in.
V'r zólle 't belaeve en vertroewe d'r ouch op,
Det de jeug van Lin Ein en Twieë, zólle blieve aan de kop.
Zjwarte boeks en Zebratrui,
dat zeen de Linder lui.
Holla - hei etc.
Lin veerdje klas volgendj jaor; 't is effe rieje meh, mót lökke toch...
Allè,
Jan Sjure,
